Blog Asociación Amigos de Francisco Carballo

Bo e Xeneroso

RACHAR A DÉBEDA CON FRANCISCO CARBALLO (1)

Escrito por Fcarballo 19-12-2018 en homenaxes. Comentarios (0)

O 21 de outubro de 2018 o xornal dixital Sermos Galiza publicou con ese título tan aqueloutrado unha entrevista ao mantedor desta bitácora. Logo, o 26 de outubro, a web da Asociación de Escritores en Lingua Galega [http://axendacultural.aelg.gal/tag/santiago-prol/] titulouna “Entrevista a Santiago Prol en Sermos Galiza. Na primeira inserían unha fotografía de Francisco Carballo tirada polo xornalista Xan Carballa e a outra enxertaba unha fotografía de Santiago Prol. Eis a nova en dúas achegas: “Medio cento de persoas participaron no roteiro cultural pola vila de Maceda para percorreren os lugares de Francisco Carballo cando se van facer catro anos do seu falecemento.

O punto de partida foi a Cafetaría Castillo, onde o escritor, presbítero, teólogo e historiador Francisco Carballo (Maceda, 1925-Salamanca, 2014), un dos máis entusiastas impulsores de Sermos Galiza, facía parte dun faladoiro cada vez que regresaba ao seu lugar de orixe. “Alí sempre quedaba Carballo coa xente de Maceda, xuntábase con quen tiña vínculos con el”, explica, en conversa con este medio, Santiago Prol, un dos impulsores da Asociación Amigos de Francisco Carballo, entidade que organiza os roteiros na súa lembranza. O último tivo lugar o sábado, día 20, na vila de Maceda. Máis tarde o medio cento de persoas que quixo honrar Carballo visitou o Museo do Médico Rural, “aínda non está aberto, mais permitíronnos a visita por deferencia e alí lembramos como os médicos de hai setenta ou cen anos ían en besta desde Maceda até aldeas como a de Celeirón, de onde el era natural. Agora a xente vén ao centro médico pero antes os facultativos tiñan un trato máis humano e directo cos pacientes”. A Biblioteca Pública Francisco Carballo foi outro dos epicentros do roteiro. Ademais de contar coa biblioteca particular que o propio homenaxeado doou ao concello, abeira un espazo dedicado a el con todos os seus libros e con imaxes e cartaces que lembran a súa traxectoria.

  

Un blog que recolle a traxectoria de Carballo. “Tamén aproveitamos para impulsar a bitácora da asociación, que suma 170 achegas nos dous anos que ten de vida”, afirma Prol, “Carballo dá moita cancha porque era teólogo, xornalista, historiador, facía recensións de libros constantemente e produciu unha cantidade enorme de artigos e publicacións”. As últimas entradas versan sobre o roteiro; sobre Castelao, coincidindo coa chegada do cadro A derradeira leición do mestre a Galiza, e sobre o libro Conversas con Francisco Carballo, do xornalista Xan Carballa e de Santiago Prol e editado en A Nosa Terra. “Francisco Carballo escribira unhas memorias que non chegara a publicar. Titulábanse Na fronteira do eclesial e no corazón do debate social pero, finalmente, decidírase por facer o libro de conversas. Aínda así hai aspectos das memorias que non saíron no libro e que publicaremos no blog”, sinala o impulsor da asociación. Outro dos contidos máis esperados é a entrevista da xornalista Tareixa Navaza a Francisco Carballo emitida na TVE. Conversa que se proxectou o sábado no roteiro por Maceda, onde se xuntaron antigos alumnos, teólogos, curas, ex curas, amigas e amigos e familiares.

N.B.- A segunda foto tiroulla ao presbítero ilustrado de Maceda o xornalista Xan Carballa. Na primeira aparecen Santiago Prol e Francisco Carballo -na primavera de 2014- no Teologado de Salamanca dos PP Paúles do que el fora reitor [tirou esta foto -o daquela rexedor de Maceda- Xabier Oviedo].

Eis outra volta o enlace ao -xa histórico- vídeo da Tareixa Navaza:

Ver Vídeo


PREMIO GALIZA MÁRTIR A TÍTULO PÓSTUMO

Escrito por Fcarballo 18-12-2018 en premios. Comentarios (0)

Aínda que xa fixemos mención a este premio noutra achega, queremos exhumar hoxe que publicaba o xornal Faro de Vigo, na súa edición de Pontevedra, o 18 de agosto de 2015, poucos meses despois do pasamento do presbítero ilustrado de Maceda con este titular: “Premio Galiza Mártir a título póstumo para Francisco Carballo”. Logo nunha entradiña, engadían: “Cidadáns, organizacións políticas, fundacións e asociacións pola recuperación da memoria histórica e a defensa dos dereitos humanos conmemoran o Día da Galiza Mártir”.

"Non é a tristura e as bágoas o que marca este acto, é o orgullo que nos enche". O presidente da Fundación Alexandre Bóveda, Uxío Breogán Diéguez, explicaba así o espírito do Día da Galiza Mártir 2015, unha celebración especial, a primeira despois de que o Ministerio de Xustiza recoñecese a inxusta morte do galeguista, e na que por primeira vez participou oficialmente a Diputación. Con ela, os concellos de Poio e Pontevedra, fundacións e asociacións que loitan pola memoria histórica e os dereitos humanos. O monumento na Caeira, o cemiterio de San Amaro e o casco vello de Pontevedra foron os escenarios dos actos. O historiador Francisco Carballo, que traballou arreo para difundir a historia de Galicia e que loitou pola transformación social do país, recibiu onte a título póstumo o décimo Premio Galiza Mártir. A entrega celebrouse no almorzo de confraternidade que deu paso ás homenaxes no cemiterio de San Amaro. Posteriormente celebrouse un acto político na praza de Curros Enríquez co que se despediron as celebracións, nas que o líder do BNG solicitou unha vez máis a institucionalización do Día da Galiza Mártir [17 de agosto] a xeito de "recoñecemento e reparación moral de todos os asasinados tanto na guerra como posteriormente". Lamentou que esta institucionalización que "levamos anos propoñendo no Parlamento por culpa do Partido Popular aínda non pudo levarse á efecto, é unha reparación necesaria dos que loitaron pola democracia e pagarono coa súa vida".

N.B.- A primeira imaxe tirámola de www.estacionatlantica.blogspot.es e a segunda de www.laopinioncoruna.es