Blog Asociación Amigos de Francisco Carballo

Bo e Xeneroso

2º ANIVERSARIO RECORDANDO A LOA DE FELIPE SENÉN (III)

Escrito por Fcarballo 12-12-2016 en cabodano. Comentarios (0)

O xornal La Opinión da Coruña, o 7 de decembro de 2014, imprentaba unha extensa loa do arqueólogo Felipe Senén, que mesmo tiña compartido co presbítero ilustrado de Maceda, o volume "Historia de Galiza" (ANPG, 1979). Titulou a loa "Francisco Carballo, vello sabio que non envelleceu". Apareceu logo no Terra e Tempo (25/XII/14), o voceiro da UPG. Imos recuperar o primeiro parágrafo e o último: "O pasado 29 do mes dos magostos finou, nunha residencia da congregación dos Paúles en Salamanca, Francisco Carballo. Para nós o imprescindible Padre Carballo. Seguidor do Cristo que bota do templo aos mercaderes do paciente Mestre escarnecido. Sólido crente na súa Terra. Referente en canto significa o nacionalismo popular galego de hoxe. Deuno todo por estes seus eidos imperfectos, divididos e recoñecémolo como druída oficiante cando celebramos festas, vodas, bautizos ou loito. Correspondémonos no seu funeral (...). Francisco Carballo non envelleceu, foi parte sólida do final desa ponte que vén da xeración Nós aos máis novos. Carballo foi home de feitos, leal aos seus e á súa terra, a que de seguro lle será leve, parte xa do ronsel de luz, compaña espiritual que sinala camiños dende o Ceo". (Na foto as cinsas de Francisco Carballo e -ao fondo- o retablo da igrexa de Asadur o día do funeral).


Debaixo: ilustración que complementa o traballo de Felipe Senén no Terra e Tempo  o 25 de decembro de 2014, doce días despois do soterramento do presbítero ilustrado de Maceda na campa de Asadur.


2º ANIVERSARIO LEMBRANDO OS COMUNICADOS DO BNG (II)

Escrito por Fcarballo 12-12-2016 en cabodano. Comentarios (0)

Co gallo do pasamento e enterro do presbítero ilustrado de Maceda, o Bloque Nacionalista Galego (BNG) pendurou dous comunicados na súa páxina web. O primeiro titulouno "Francisco Carballo: na memoria de Galiza, sempre!": Galiza perde a un gran intelectual, historiador e pensador. O BNG tamén perde a un dos seus militantes máis veteranos e máis xenerosos para con este proxecto colectivo. Ao abeiro do funeral titulaban "Acto de despedida e recoñecemento a Francisco Carballo, clave no proceso nacional de Galiza": O BNG quere lembrar a figura de Francisco Carballo como persoa fondamente comprometida co proxecto nacional galego, desde a súa volta en 1973. O seu labor como historiador permitiu que puidésemos reencontrarnos cunha historia non deturpada do Noso País (...). Tamén amosou o seu compromiso participando esforzos para dotalo de medios de comunicación propios. Foi presidente do consello de administración d´A Nosa Terra (ANT) e formou parte do grupo promotor do semanario. A participación de Francisco Carballo nas listas do BNPG e do BNG en diversas convocatorias electorais, mostra o seu compromiso total coa nación na que cria. O BNG anima a todas as persoas que comparten con Francisco Carballo esta angueira a que acudan ao acto de soterramento e despedida. (Foto das súas cinzas na igrexa de Asadur denantes do acto relixioso).


2º ANIVERSARIO DO FUNERAL E DO ENTERRO EN ASADUR, 13 DE DECEMBRO (I)

Escrito por Fcarballo 09-12-2016 en cabodano. Comentarios (0)

O xornal La Región de Ourense daba conta, o 14 de decembro de 2014, cunha xenerosa foto de Francisco Carballo, dos actos do funeral e posterior enterro das súas cinzas na campa do igrexario primixenio e definitivo: "A igrexa de Asadur, no concello de Maceda, despediu onte ao seu fillo Francisco Carballo, sacerdote, teólogo e historiador que faleceu días pasados na residencia xeriátrica dos PP Paúles de Salamanca, congregación á que pertencía e na que estaba ingresado. O funeral celebrado en Asadur foi oficiado por seis sacerdotes e ao templo acudiron numerosos veciños, amigos e admiradores de Francisco Carballo, que se desprazaron até aquela parroquia para darlle o último adeus. Entre estes encontrábanse moitos sacerdotes que foran alumnos de Francisco Carballo, así como unha representación do nacionalismo galego, os deputados Bieito Lobeira e Olaia Fernández Davila do BNG; o alcalde de Allariz, Francisco García (BNG) e o alcalde de Maceda, Xabier Oviedo (CxG). No transcurso do oficio relixioso púxose de manifesto a personalidade e os valores que representou Francisco Carballo, cuxas cinzas repousan dende onte no cemiterio de Asadur". (Foto: arquivo LR).

TELEGRÁFICA ENTRADA NO DICIONARIO ENCICLOPÉDICO GALEGO UNIVERSAL

Escrito por Fcarballo 06-12-2016 en Novas. Comentarios (0)


Carballo Carballo, Francisco (Celeirón, Asadur, Maceda, 1925). Escritor. Foi presidente do consello de administración de Promocións Culturais Galegas e presidente da Asociación Cultural de Vigo. Participou nos libros colectivos Castelao sen manipulación (1984), A nosa literatura (1988), Historia de Galicia (1-2) e Doce anos na búsqueda da nosa identidade (1991). Iso é "todo" o que aparece sobre Francisco Carballo no tomo 13 (páx. 43) do Dicionario Enciclopédico Galego Universal (DEGU), que publicaron conxuntamente a editorial Ir Indo e La Voz de Galicia no ano 1993. O resto do dilatado currículo do presbítero ilustrado de Maceda, non consta nesta colección de 60 tomos. A entrada anterior é a de Ricardo Carballo Calero que ocupa corenta liñas da columna correspondente. A Francisco Carballo dedicáronlle nove e media... (Na prestixiosa e "referente" Gran Enciclopedia Gallega (GEG) de Silverio Cañada (1974-1991), ¡non aparece en ningún dos 30 tomos e apéndices!). Eis unha das múltiples razóns para artellar a Asociación Amigos de Francisco Carballo e a bitácora:  poñelo no lugar que lle corresponde no contexto do Noso País.



HOMENAXE NACIONAL EN MARÍN CON DOUS AMIGOS DE MACEDA E PRISCILIANO DE FONDO, 2005

Escrito por Fcarballo 01-12-2016 en homenaxes. Comentarios (0)


Francisco Carballo con Bieito Seara (naquela altura cargo de máximo nivel no organigrama da Xunta / Goberno Bipartito) e Santiago Prol. Ao fondo, á esquerda, Tonhito de Poi interpretando o tema que compuxo sobre Prisciliano. Tirou a foto Xan Carballa na cea posterior á entrañábel Homenaxe Nacional, que tiveron a ben organizar en Marín en 2005 e que, en chegando, peneiraremos. Anos despois revelaríanos Paco Carballo que uns días antes desta sentida e magna homenaxe, lle diagnosticaran o cancro que padeceu na última etapa da súa vida, que mesmo foi o que o levou (nove anos despois). Daquela non llo dixo a  case ninguén. Con 80 anos de idade, seguíu traballando a prol do Noso País con todas as forzas que lle quedaban, nomeadamente como columnista en A Nosa Terra (até o verán de 2010), no eido teolóxico e pastoral, nas vindicacións polas causas xustas e..., sempre, sempre co mesmo norte: Galiza e a súa dignificación como pobo.

Eis o link do tema "Prisciliano" da Banda de Poi:

Link