Blog Asociación Amigos de Francisco Carballo

Novas

O DOUTOR CELSO SÁNCHEZ, CANDIDATO AO SENADO

Escrito por Fcarballo 09-10-2019 en Novas. Comentarios (1)

O título debería ser máis longo: "O doutor Celso Sánchez, a ética ao servizo da colectividade, mesmo como candidato ao Senado". Decidimos dende esta bitácora dedicarlle unha achega ao doutor Celso Sánchez, socio fundador e persoa central da Asociación Amigos de Francisco Carballo dende que se constituíu. Na imaxe que a encabeza podemos ollar a Francisco Carballo, ao doutor Celso Sánchez, a Bieito Seara  e ao mantedor desta bitácora (Santiago Prol) nas aforas da residencia dos PP Paúis en Santa Marta de Tormes (Salamanca) na primavera de 2014. Sabemos que a Francisco Carballo lle gorentaría ver ao doutor Celso Sánchez como senador en Madrid exercendo de galego con maiúsculas. Eis a nosa laudatio:

"No privilexiado miradoiro da Serra de San Mamede (Castro de Escuadro) naceu o doutor Celso Sánchez en 1955. Quedou orfo de pai aos 15 anos. El e as súas irmás saíron adiante coa axuda da súa nai e co esforzo dos catro. Consolidamos amizade na vila de Maceda a comezos dos 80 preparando o futuro. Pasamos moitos intres de conversa -ao mediodía e ao empardecer-, na cafetería do Cesáreo (que chamabamos O Comité Central). Naquela altura seguiamos de cerca a Revolución en Nicaragua. Meteunos de cheo no día a día do Frente Sandinista de Liberación Nacional (FSLN). Mesmo nos pasara o instrutivo álbum Guitarra Armada (1979) dos irmáns Luís e Carlos Mejía Godoy y los de Palacagüina. Despois agromou o demais: o dobre vinilo Abril en Managua (1983), libros de Cortazar, Ernesto Cardenal, Tomás Borge, Sergio Ramírez, Gioconda Belli... Viaxou logo o doutor Sánchez a unha Nicaragua -xa lampedusiana-, en misións humanitarias de Médicos Sen Fronteiras.  

Reencontrámonos no ennobrecemento do veterinario comunista Benigno Álvarez e dos caídos e represaliados do 36, feita con moito tacto nun contexto hostil (1997) e coa dereita gobernando todas as institucións (en Maceda cun bipartito contranatura PP-PSOE, logo da espuria moción de censura a Bieito Seara, rexedor do BNG). Despois artellamos a homenaxe ao presbítero ilustrado Francisco Carballo (verán de 2000). O doutor Sánchez -que estivo en primeira liña- conforma hogano con Bieito Seara e nós mesmos, a cerna da asociación que procura manter acesa a memoria do historiador de Celeirón de Asadur.

Celso sabe escoitar a quen lle pode aportar algo. É persoa de mundo, culta e cosmopolita. Leva a política nas veas dende que tivo conciencia de seu. Foi dirixente estudantil de ERGA. Logo estivo no Consello Nacional do BNG (polos non adscritos), mesmo na altura da catástrofe do Prestige (novembro de 2002), onde se implicou a fondo na defensa das costas do Noso País. Relaciónase ben en case todas as frontes; mesmo con parte da Galicia oficial. Ten moitos amigos e moreas de coñecidos. Persoa chea de sensibilidade, pai de familia modélico, amosa grande capacidade de diálogo. Ademais da súa profesionalidade como médico (antes no Irixo, agora en Coles), é un dos pioneiros na dignificación da Atención Primaria no mundo rural galego. Ecoloxista fidedigno -non dos de salón- estivo na dirección de ADEGA (nomeadamente contra as plantacións masivas de árbores invasoras, das que trouxera sementes Frei Rosendo Salvado de Australia a mediados do XIX). Fundador e socio da histórica Agrupación Cultural Os Cabaceiros de Maceda. Outrosí activista na Fundación Insua dos Poetas; un fermoso proxecto abandeirado polo seu amigo Luís González Tosar (presidente do PEN Club Galicia, poeta, columnista e referente cultural en La Voz de Galicia). Mesmo é o médico de cabeceira do Club Ciclista Maceda-Academia Postal (que xa ten corredores recoñecidos a nivel mundial). Foi subdirector de Atención Primaria en Ourense na xeira do Bipartito, sindicalista con cargos ao máximo nivel na CIG Sanidade. Membro da xunta directiva do Colexio de Médicos de Ourense (dúas lexislaturas). Outrosí de diversas plataformas.

O doutor Sánchez é unha persoa íntegra, distinguida e xenerosa. Posicionouse para a alcaldía de Maceda en maio deste 2019 dende unha cosmovisión socialdemócrata de nacionalista sosegado (CxG). O compromiso ético (e estético) da súa traxectoria é o seu mellor aval para o seu novo reto como candidato ao Senado (nas listas de integración nacionalistas por Ourense arredor do BNG) para as Eleccións Xerais de novembro deste 2019. Todo un luxo no panorama da política en xeral e da ourensanía en clave nosa".


N.B.- Na segunda imaxe outrosí en Santa Marta de Tormes (Salamanca), de dereita a esquerda, o doutor Celso Sánchez, Bieito Seara e Francisco Carballo (os tres macedáns -e amigos-candidatos ao Senado ou ao Congreso dos Deputados nalgún intre das súas vidas políticas). Esta foto tirouna o mantedor desta bitácora e a primeira tirouna Xabier Oviedo, naquela altura alcalde nacionalista de Maceda. Beizón!

"O VATICANO É UNHA EXCRECENCIA"

Escrito por Fcarballo 03-10-2019 en Novas. Comentarios (0)

Por mor dos últimos escándalos financeiros que involucran a "peixes gordos" do Vaticano (compras inmobiliarias millonarias no exterior: inmobéis de luxo en Londres con escuras empresas inglesas que terían participado na vomitiva operación financeira -con diñeiro inicialmente destinado pra erradicar a pobreza...-), queremos traer á bitácora unha das afirmacións máis contundentes que fixera Francisco Carballo no libro de "Conversas" (ANT, 2002). No capítulo "Relixión. A inculturación da fe", na páxina 61, conversando sobre os ateos "de verdade", Carballo dicía que teimaban en atacar ao Vaticano e que iso tamén o facía el, "porque o Vaticano é unha excrecencia. Á institución eclesiástica tamén a critico eu. Hai comunidades que son unha cova de áspides; Igrexas que son unha fábrica de torturas, pero iso non ten nada que ver co fondo do tema. Eu non me paso por iso ao budismo ou ao ateísmo. Permanezo eiquí porque encontro uns valores respectábeis. Eu fago crítica das súas realizacións deterioradas". Xan Carballa máis o mantedor desta bitácora preguntámoslle se podíamos publicar literalmente que o Vaticano era unha excrecencia. El non o dubidou en ningún intre. Carballo en estado puro!!!

N.B.- A imaxe do Vaticano tirámola desta volta ded www.rionegro.com.ar.

A nova sobre o último escándalo do Vaticano está a saír en moreas de mass media nestes intres. Eis un enlace:  

https://www.lanacion.com.ar/el-mundo/un-nuevo-escandalo-financiero-involucra-peces-gordos-nid2293402


AGRUPACIÓN CULTURAL OS CABACEIROS NO MONOGRÁFICO DE "TERRA E TEMPO" (2019)

Escrito por Fcarballo 23-07-2019 en Novas. Comentarios (0)

Recollemos do xornal SERMOS GALIZA: "O vindeiro 25 de xullo (de 2019), ás 18.30 horas, o Festigal (Compostela) acollerá a presentación dun novo número da publicación Terra e Tempo titulada Resistencia e expansión cultural. Crónica do movemento cultural galego na ditadura (1961-1976). O volume recolle artigos de trinta e dúas autoras e autores sobre vinte e cinco asociacións culturais e será presentado por María Pilar García Negro, Nemesio Barxa e Pilar Allegue. Nesta ocasión representa a radiografía máis completa do movemento cultural galego na ditadura. Trátase dunha aproximación a un sector daquela mocidade con ganas de rachar cunha dinámica cultural paternalista e desgaleguizadora".

Tocounos a nós facer o traballo sobre a Agrupación Cultural Os Cabaceiros de Maceda que, no introito do "Terra e Tempo" definen como "galegos de lei en Maceda". En 14 páxinas de texto e documentos gráficos fixemos unha radiografía da nosa histórica asociación cultural, que subtitulamos "Doce anos de concienciación e de identidade (1974-86)". Imos restacar prá bitácora só o que lle dedicamos a Francisco Carballo. Pró resto do noso traballo, invitamos a quen nos sigue, teña a ben adquirir o monográfico completo e asistir no Festigal á presentación: 

"(...) Outrosí o historiador Francisco Carballo, orixinario de Celeirón de Asadur [Maceda] que xa estaba operando ao máximo nivel na  Asociación Cultural de Vigo, “unha das máis politizadas e vixiadas pola policía. Naquela época utilizouse como plataforma política. Primeiramente todo o galeguismo e o antifranquismo. Logo foi indo na liña da UPG” comentounos no libro de Conversas [Prol / Carballa: 2002]. Logo engadía: “Estiven de presidente da Cultural até o 85. Faciamos cursos de galego, clases e montaxes audiovisuais sobre Historia de Galiza e sobre Rosalía. Organizamos excursións co lema Coñecer Galiza. Conferencias no Centro Cultural da Caixa de Aforros de Vigo. Trouxemos a Benedetti, a Barxa de Quiroga, a Costa Gomes, a Miguel Anxo Araúxo, a Ruiz Giménez... Outrosí a Theodorakis co seu xeito coral de ollar o Canto General de Neruda”. Dese referente bebeu en parte a nosa asociación cos poucos medios que tiña.

 

Cóntanos o doutor Sánchez que no outono de 1974 el e o doutor Lage [daquela aínda estudantes de Medicina] se desprazaran até a Escola Normal de Maxisterio de Vigo -dende Compostela- para contactar co presbítero ilustrado de Maceda para que lles axudase naquel proxecto. Xusto o día que foran [un venres], era o que libraba Carballo das súas obrigas docentes. Faríano ao ano seguinte para que impartise unha charla sobre a Nosa Historia. Francisco Carballo -xa comprometido co nacionalismo e co proxecto d´ANT-  fixera, no pioneiro libro Historia de Galicia promovido pola Fronte Cultural da ANPG [1979], a parte correspondente á Idade Moderna e o Apéndice [Idade Contemporánea dende 1939 até 1979], no que imprentara: “No mes de agosto de 1975 Galicia viviu unha onda de terror. Detencións e rexistros domésticos culminaron o día 12, no que a policía española asasinou a Xosé Ramón Reboiras Noia, un dos dirixentes da UPG”. Pola verba “asasinou” puxéronlle unha denuncia, retiraron o libro do mercado, fixéronlle un xuízo e logo foi condenado a seis meses de cárcere. Unha denuncia que apareceu pouco despois do 23-F, onde Carballo tamén aparecía nas “listas negras”. Na páx. 217 dese volume escribiu: “Tanto prá contracultura como prá cultura popular, un dos vehículos foron as asociacións culturais de cidades e vilas. Loitaron pola galeguización e serviron de oportuna cobertura de organizacións sindicais e políticas clandestinas. En Ribadavia montaron unha mostra anual de teatro que ten alentado esta arte. A lingua galega, tan atacada polo franquismo, foi o santo e seña da oposición. Os nacionalistas reivindicaron a normalización do galego, da súa oficialidade exclusiva pra liberar esta comunidade colonizada” (...).

N.B.- A primeira imaxe amosa a portada do "Terra e Tempo" deste 2019. A segunda é o cabaceiro deseñado polo alfareiro Benito Gándara de Maceda, que empregaban como agasallo. A terceira é o póster do Castelo de Maceda que se puxo á venda pra recaudar fondos prá agrupación. A última é un recorte parcial do traballo que nós tiñamos feito sobre as primeiras -e xa históricas- xornadas culturais artelladas polos Cabaceiros en Nadal do 74 e que imprentamos no xornal La Región de Ourense (Prol, 1986). Beizón!

Eis o enlace á nova en SERMOS GALIZA: https://www.sermosgaliza.gal/articulo/cultura/mais-completa-radiografia-das-asociacions-culturais-franquismo-festigal/20190721124551082132.html

PARQUE FRANCISCO CARBALLO DE MACEDA

Escrito por Fcarballo 10-03-2019 en Novas. Comentarios (0)

Estivemos en Maceda este sábado, 9 de marzo, con Bieito Seara, impulsor, socio fundador e un dos motores de explosión da Asociación Amigos de Francisco Carballo. Díxonos [diante dunha 1906 nunha tasca enxebre da Rúa do Medio da nosa vila natal, mesmo departindo co outro socio fundador, o doutor Celso Sánchez] que o actual alcalde Rubén Quintas puxera unha placa no Parque Francisco Carballo de Maceda, co gallo da recente inauguración da nova área infantil, que mesmo está inserida dentro dese recinto. Ao seu carón está a Biblioteca Pública que tamén leva o nome de Francisco Carballo e que fora aprobada por unanimidade na xeira -como alcalde- de Bieito Seara e executada na do rexedor Manuel Rodríguez Carballo. O parque que tamén leva o seu nome fora iniciativa do alcalde Xabier Oviedo na anterior lexislatura. A placa, aínda que ubicada nun lugar abondo discreto e un tanto difuminada no contexto do parque infantil, amosa outro vestixio ao recoñecemento do presbítero ilustrado de Celeirón de Asadur. Beizón aos catro os rexedores. Inserimos desta volta unha breve reportaxe fotográfica que fixemos "in situ" hoxe pola mañanciña...

N.B.- A primeira foto amosa a placa coa "literatura oficial" [mesmo co orzamento]. Na segunda [debaixo do noso texto] pódese ollar a Biblioteca Pública Francisco Carballo [e o cruceiro de Maceda] dende o parque que tamén leva o seu nome. A terceira procura unha visión de conxunto de todo o parque. A cuarta, a quinta e a sexta amosan a área infantil dende diferentes perspectivas.

A NOSA TERRA NA ARAÑEIRA

Escrito por Fcarballo 29-10-2018 en Novas. Comentarios (0)

Cóntanos Xan Carballa que xa arrincaron outra volta con www.anosaterra.com, procurando un xornalismo que non sexa de día a día, senón de máis longo percorrido. Lemos en SERMOS GALIZA a nova baixo o título “A Nosa Terra volve á rede sete anos despois”. Eis a nova completa, mesmo coa imaxe que penduraron. Tanto no proxecto d’ANT como no de SERMOS, Francisco Carballo tivo un papel central. Na primeira cabeceira durante moitos anos na xeira democrática e no segundo na súa creación:  “A histórica cabeceira, fundada en 1907, desaparecera en setembro de 2011, un ano despois de fechar o semanario en papel. Naquela altura, o conselleiro delegado e ex director Afonso Eiré agoiraba o retorno do proxecto: "A Nosa Terra é unha constante de supervivencia, seguro que voltará a aboiar e voltará ao mercado". Se imos á rede e escribimos anosaterra.com o que imos achar de entrada, na súa capa, son artigos de Afonso Eiré, Manuel Veiga e Xan Carballa, o núcleo histórico da redacción dun medio que, até a súa desaparición primeiro no quiosque e despois na rede, foi todo un referente no espazo galego de comunicación. O dixital presenta como un dos "atractivos" do seu retorno a disponibilización na rede da colección contemporánea do semanario (1977-2010), até o momento do seu fechamento o único medio galego impreso nos quiosques con esa periodicidade [Sermos tomou o relevo en xuño de 2012]”.