Blog Asociación Amigos de Francisco Carballo

homenaxes

MÉNDEZ FERRÍN E FRANCISCO CARBALLO (2)

Escrito por Fcarballo 09-12-2017 en homenaxes. Comentarios (0)

“Persoalmente nunca esquecerei as horas roubadas ao sono en que Carballo, Domingos Blanco e máis eu debatiamos, nunha casiña dos Paúles  sita en Lavadores, dos asuntos da teoría e práctica da esquerda nacionalista. Era aquela unha célula da UTEG (Unión de Traballadores do Ensino de Galicia), organización sindical clandestina. Logo, ao se crear a ANPG, ingresamos todos no novo organismo e, cando centos de militantes fomos purgados en 1977 pola actual xefatura do BNG, Carballo e eu perdemos o contacto político. El permaneceu co que é hoxe o BNG, eu fiquei naturalmente cos amigos independentistas que hogano conforman a FPG.

Todo o cal non impediu que, no xuízo derivado da detención masiva de independentistas en setembro de 1980, Francisco Carballo fose declarar perante a Audiencia Nacional, o cal revela magnanimidade e, por qué non dicilo, un valor pouco común. Foi declarar en favor dos que os poderes públicos chamaban “terroristas”. Certo, estas cousas non se esquecen nunca. Como nunca esqueceremos a Francisco Carballo, hai pouco por certo, dando o peito na Delegación do Goberno para pedir a liberdade dos presos e das presas independentistas actuais.

Alén diso, alén da súa xenerosidade e apertura de ánimo, Francisco Carballo é un home profundo, sensíbel, intelixente e traballador. Autor dunha obra importante en materia teolóxica e de Historia da Igrexa Católica, a partir dos anos setenta a súa curiosidade e a súa pluma vérquense sobre Galicia e convértense ao idioma galego para sempre. ¡Feliz conversión!

Desde os anos 70, dúas lealdades de Carballo conflúen: a Patria e a fe católica que el, coma os mellores dos seus, prefire, cunha táctica moi comprensíbel, chamar a penas cristián. A isto habería que unir unha sensibilidade e un desexo de igualdade no mundo que aproxima a Francisco Carballo á teoloxía da liberación e ao socialismo como horizonte no mundo real. Unha obra abundante e varia, na que o pensamento e a desvelación histórica se alían a unha dicción directa e fonda, fai que este varón amigo e sabio, de setenta e cinco potentísimos anos, campe no panorama da cultura galega contemporánea coma un carballo (velaí a maxia da onomástica), dispensador de paz, doutrina e cordialidade” [Faro de Vigo, 4/VIII/2000].

N.B.- Na primeira foto aparece Ferrín en Vilanova dos Infantes en maio do 2015 (fonte: www.atlantico.net). Na segunda [de Xan Carballa] vemos a Francisco Carballo participando nunha campaña a prol da galeguización da toponimia en 1982. Na terceira podemos ollar a fachada do edificio -buque insignia- do Grupo Academia Postal en Ourense. Nesa casa (Rúa Reza, 3) naceu Méndez Ferrín o 7 de agosto de 1938. Francisco Carballo estivo nese edificio (en 2013) invitado polo fillo sobranceiro de Maceda, Paco Nóvoa (director do GAP). Os dous consideraron que Ferrín debería ter unha placa conmemorativa na fachada do edificio. Disque o escritor lle comentou a Paco Nóvoa que para cando el finase [na mostra artística e divulgativa sobre Ferrín "Parahomenaxearte", que estivo pendurada no edificio de Academia Postal -e casa natal do escritor-, en outono de 2006].

MÉNDEZ FERRÍN E FRANCISCO CARBALLO (1)

Escrito por Fcarballo 08-12-2017 en homenaxes. Comentarios (0)

Cando artellamos a homenaxe a Francisco Carballo en Maceda, o 4 de agosto de 2000, puxémonos en contacto epistolar con Xosé Luís Méndez Ferrín para invitalo aos actos programados. Mesmo lle suxerimos tivese a ben facer unha evocación nunha das súas columnas semanais no Faro de Vigo. Sempre que lle pedimos algo nesa liña aceptou (Benigno, Gayoso, Carballo, Felos...). ¡Beizón! Aínda que non puido vir a Maceda aquel sábado, imprentou unha sentida columna que imos recuperar en dúas achegas. A relación dos dous viña de lonxe. Ao pouco de chegar Carballo a Vigo, contactou con Ferrín [Cultural e UTEG]. Esa columna, xunto coas demais escritas naquel ano 2000, acadaron o II Premio “Roberto Blanco Torres” de Xornalismo de Opinión. Foran publicadas en formato libro en 2001 pola USC [hogano, mesmo podemos atopar ese volume en google books]. Eis unha senlleira columna para enmarcar:

“Celébrase hoxe na vila de Maceda unha homenaxe a Francisco Carballo, a quen os promotores do acto consideran, con moita razón, o fillo máis sobranceiro vivo do concello de Maceda, limitando eles prudentemente o eloxio ao mundo dos vivos. Este cronista, que tanto soñou de neno coa Serra de San Mamede e coa súa fauna mítica, únese cordialmente á homenaxe. Desde o Castromao estivera outeando ao lonxe os altores do San Mamede, en cuxas neves morrera o Benigno no 37, e mandeille apertas etéreas ao meu amigo Francisco Carballo, da Congregación de San Vicente de Paúl. Congregación nada ao abeiro dos rigores de Trento, que tanta importancia sociolóxica revestira na reacción neocatólica na provincia de Ourense no XIX. Os Paúles señoreaban o Santuario dos Milagres e rexentaban o Seminario Menor e maila capela, simbólica do meirande arcaísmo relixioso, de Santa María a Madre, a carón do pazo episcopal.

Mudaron os tempos e os Paúles decidiron facerse presentes no mundo actual. Tomaron un certo partido polas esquerdas políticas e sociais destacando membros nas súas angueiras de avanzada democrática no mundo. Así apareceu en Vigo unha comunidade de Paúles consagrados ao que eles chamaron sacerdocio obreiro e ao galeguismo de vangarda. Coñecinos eu na década do 1970 a 1980 e sempre lembrarei a sinceridade deses cregos honrados e traballadores, que crían sen dobrez na necesidade de cambiar o mundo tanto desde Galicia somo desde Sudamérica. Desde aquela quedou sempre nun espazo próximo a min, a nós, Francisco Carballo (...)”. 

N.B.- A primeira foto [de Xan Carballa] na primeira Carreira da Lingua, organizada pola Federación de Asociacións Culturais Galegas. Carballo presidía naquela altura a Asociación Cultural de Vigo. A segunda foto -da mesma época- recuperámola de www.literaturagalega.as-pg.gal.

HOMENAXE DO BNG EN MARÍN (e 4)

Escrito por Fcarballo 01-05-2017 en homenaxes. Comentarios (0)

 

No dixital www.pontevedraviva.com aparecía, o domingo, 18 de xaneiro de 2015, o titular “Homenaxe a Francisco Carballo en Marín”. Vertemos do orixinal a crónica que ía acompañada dunha galería fotográfica de Diego Torrado. Naquel nobre acto vindicativo e de lembranza tamén se volveu proxectar o fermoso vídeo de Xan Carballa que, semanas antes, fora visualizado na Homenaxe de Galiza a Francisco Carballo en Maceda. Eis o texto do dixital pontevedrés:

“Francisco Carballo falecía en Salamanca o pasado 29 de novembro de 2014 aos 89 años. A súa figura deixou fonda pisada en Marín onde residiu durante boa parte da súa vida. O profesor asumiu dende 1954 a 1958 o cargo de director técnico do colexio dos Padres Paúles "San Narciso" e, despois de xubilarse, exerceu como Superior de la Comunidade dos Paúles en Marín.

 Durante a tarde do sábado (17/01/2015), destacados membros do BNG de Marín e de Pontevedra realizaron un acto de homenaxe á figura do nacionalista no Multiusos da Praza de Abastos de Marín, coa presenza do alcalde de Pontevedra, Miguel Anxo Fernández Lores, ademais de varios concelleiros de Pontevedra como Carmen Fouces, Luis Bará e outros de Marín. Francisco Carballo foi un dos grandes ideólogos do nacionalismo galego, mesmo participou na constitución do BNG e militou na ANPG. O Padre Carballo, como era coñecido por moitos alumnos na vila marinense, dedicou a súa vida á investigación e á recuperación da historia de Galicia. Ao longo da súa vida colaborou coa publicación A Nosa Terra e coa revista Encrucillada, ademais de ter escrito diversas obras sobre nacionalismo y sobre teoloxía”.

Este é un bo intre para ollar -outra volta- o emotivo e intenso vídeo de Xan Carballa, que mesmo titulou Francisco Carballo, sempre no corazón, que abeira as 1.100 visitas mentres escribimos esta achega. Animamos ao lector/a para que nos axude a superar esa cifra. Beizón! Eis o link:

Visualizar Vídeo

HOMENAXE DO BNG EN MARÍN (3)

Escrito por Fcarballo 29-04-2017 en homenaxes. Comentarios (0)

O xornal Faro de Vigo titulaba -en galego- o 14 de xaneiro de 2015, "Tributo ao pai Francisco Carballo". Logo subtitulaba: "O BNG organiza unha homenaxe ao recordado mestre e crego".

O pai Francisco Carballo, recordado crego e mestre do colexio San Narciso de Marín, recibirá unha homenaxe organizada polo BNG o vindeiro sábado 17, no Multiusos da Praza de Abastos. O acto está promovido polas asembleas de Marín e Pontevedra da organización na que militou e colaborou fondamente o pai Carballo, "unha persoa implicada na defensa deste país", como o recordou o concelleiro nacionalista Xosé María Vilaboa ao presentar a actividade.

 

O pai Carballo morreu o pasado 29 de novembro en Salamanca, aos 89 anos de idade. Ainda que nacera en Maceda, tivo unha forte vinculación con Marín, onde exerceu como docente no colexio San Narciso e cubríu as ausencias de todos os cregos do concello cando fixo falta. Por iso os organizadores deste tributo fixeron un chamamento á participación de todos os veciños, de calquera ámbito social e ideolóxico, en recoñecemento a unha persoa "xenerosa, honesta, que deixou unha pegada profunda en todo aquel que o coñeceu", como dixo o concelleiro pontevedrés Luís Bará. A homenaxe contará con varias actuación musicais e comezará ás 18.30 horas. 

 (Na primeira foto -farodevigo.es- aparece o actual deputado no Parlamento Galego, Luís Bará cos outros dous compañeir@s nacionalistas da contorna na presentación aos medios da homenaxe. Na segunda está Anselmo López Carreira, un dos membros máis egrexios da Escola de Historiadores que impulsou Francisco Carballo, na súa intervención como historiador moi vencellado a el dende 1979. Fonte: www.pontevedraviva.com).

HOMENAXE DO BNG EN MARÍN (2)

Escrito por Fcarballo 29-04-2017 en homenaxes. Comentarios (0)

(...) "Unha persoa que representa, de maneira radical, o sentido de ideas como ética, compromiso, nacionalismo ou Galiza. Palabras que máis alá da retórica son ferramentas imprescindibeis para o traballo organizativo, para o labor político, para a responsabilidade institucional. Ética e compromiso para defender unha sociedade máis xusta e igualitaria, na que desaparezan os privilexios duns poucos e se poñan por diante os intereses e os dereitos da maioría. Termos necesarios nun tempo coma o actual no que o gran capital e os gobernos que os serven queren condenarnos á precariedade, á intemperie, á miseria. Ética e compromiso tamén como antídotos contra a submisión, a resignación ou do medo, que son as consignas da orde global dominante para gañar a batalla das ideas. Ética e compromiso para denunciar un sistema cruel e corrupto que saquea o público, que destrue o territorio, que emprobrece e dilúe a diversidade, que globaliza a inxustiza, a probreza e a guerra. Ética e compromiso para facerlle fronte á ofensiva contra as liberdades e os dereitos democráticos. Para combater o ataque os dereitos da clase traballadora; a utilización da policía, da xustiza e da política para perseguir con multas, con detencións e coa cadea aos discrepantes, aos que defender na rúa dereitos fundamentais aos que non podemos renunciar.

Nacionalismo e Galiza para facerlle fronte a eses mesmos designios e politicas que nos negan como nación, que coutan o desenvolvemento das nosas capacidades e recursos, e que queren condenarnos á dependencia e á pobreza. Nacionalismo e Galiza para defender a lingua que nos une, a nosa identidade cultural, a nosa historia, o territorio, unha forma xenuina de ser e estar no mundo. Nacionalismo e Galiza, en fin, para crer en nós memos, para actuar con coraxe, con determinación e orgullo, para defender o país e traballar polo seu futuro con todas as forzas. El tamén entendeu que o instrumento para andar ese camiño era o BNG, o espazo de encontro dos anceios de xustiza social e de autogoberno. Francisco Carballo era merecedor desta homenaxe, de todas as homenaxes. Honremos pois a súa memoria traballando para cumprir as ideas polas que el loitou, para facer realidade os seus soños. O deseño dunha Galiza próspera, acolledora e solidaria, un país soberano, igualitario e xusto”. MIGUEL ANXO FERNÁNDEZ LORES, Marín, 17/01/2015.

(Na primeira foto -pontevedra.bng.gal- aparece Xan Carballa, o alcalde Lores e as outras persoas que interviron no acto en primeiro plano, mesmo coas xentes de ben de Marín, Pontevedra e contorna que estaban presentes e que reflicte o gran poder de convocatoria que tivo aquela sentida homenaxe. Na segunda imaxe aparece -no centro- o retrato dun Francisco Carballo, xa moi "tocado", pero que endexamáis perdeu o seu sorriso contaxioso).