Blog Asociación Amigos de Francisco Carballo

documentos

PIONEIRO A PROL DA VINDICACIÓN DA NOSA LINGUA

Escrito por Fcarballo 23-06-2019 en documentos. Comentarios (0)

No libro de Conversas (Prol / Carballa, ANT, 2002) aparecen -nas páxinas 172 e 173- varios documentos gráficos nos amosamos a Francisco Carballo participando activamente nas campañas a prol da galeguización da toponimia en galego e tamén na Primeira Carreira Popular en Defensa do Idioma Galego, organizada pola Federación de Asociacións Culturais Galegas e abandeirada pola Asociación Cultural de Vigo, que presidía naquela altura (comezos dos anos 80) o presbítero ilustrado de Maceda. Remésanos agora Xan Carballa outras fotos da mesma xeira nas que podemos ver a Francisco Carballo con Xosé Luís Méndez Ferrín como pioneiros do que hogano son os Correlingua, que se veñen celebrando todos os anos ao abeiro da data das Letras Galegas. No primeiro documento gráfico que nos pasa Xan (autor de todas elas), ollamos a Francisco Carballo lendo o manifesto que caligrafara o escritor Millán Picouto. Na segunda aparece Méndez Ferrín detrás de Carballo moi perto do que hoxe é a Fundación Penzol en Vigo e, na terceira, xa co testemuño en mans de Ferrín, comezando a Carreira Popular en Defensa do Idioma Galego, dirixíndose cara a rúa Príncipe de Vigo. O noso agradecemento a Xan Carballa por pasarnos estes documentos que fornecen a bitácora e que dignifican -aínda máis- ao Carballo sempre comprometido coas causas nobres de Galiza... Agora que, por fin, a RAG lle vai dedicar as Letras Galegas ao outro Carvalho (Calero), nós seguimos traballando para que -na altura de 2025- teñan a ben ir pensando -dende a rúa Tabernas da Coruña- no outro Carballo (Francisco), para que acade ese recoñecemento polos servizos prestados ao Noso País. Beizón! 

N.B.- Autoría das tres fotos: Xan Carballa.

DOCUMENTOS GRÁFICOS EN SALAMANCA

Escrito por Fcarballo 17-03-2018 en documentos. Comentarios (0)

Xa dixemos que aquel sábado, 24 de maio de 2014, fora inesquecible. Mesmo foi a penúltima vez que estivemos con Francisco Carballo. O alcalde de Maceda, Xabier Oviedo, que sempre leva un bo aparello fotográfico con el, procurou fixar en imaxes o encontro que xa quedou en todos nós para o resto das nosas vidas.

Na viaxe de ida, fomos dende a súa terra de orixe Xabier Oviedo (que conducÍa o seu coche), Bieito Seara e Santiago Prol. O doutor Celso Sánchez saíunos ao encontro en Santa Marta de Tormes (Salamanca) dende Madrid. Ao comezo da xornada -pola mañá- ollamos o Francisco Carballo enérxico de sempre malia a enfermidade grave que naquela altura padecía. Nesta imaxe podemos observalo nos arredores do edificio dos PP Paúles, contándonos pormenorizadamente o por que do "seu exilio" en Salamanca.

Nestas fotos, na parte de atrás do edifiicio onde se atopa o "xeriátrico" dos PP Paúles para todo España, podemos ollar, de esquerda a dereita a Santiago Prol, Francisco Carballo, Xabier Oviedo e Bieito Seara. O presbítero ilustrado de Maceda agradecía as visitas dos amigos (que foron moitos dende moitos lugares de Galiza) no tempo no que estivo en Salamanca até a viaxe derradeira, na que voltou á terra que o vira nacer, na parroquia de Asadur (Maceda, Ourense).

Esta tirouna Xabier Oviedo. Nela aparecemos Santiago Prol, Celso Sánchez, Francisco Carballo e Bieito Seara.

Outra imaxe do inmenso edificio dos PP Paúles que tirou Xabier Oviedo. Francisco Carballo fora destinado, como reitor do teologado San Vicente de Paúl de Santa Marta de Tormes (Salamanca) en 1965. El deixou escrito que aquel edificio salmantino parecía unha Arca de Noé. Fora unha etapa intensa -de oito anos- á que lle meteremos o dente en varias achegas. Estivo alí até 1973, ano no que decidiu regresar a Galiza dende a base, mesmo renunciando a unha carreira eclesiástica moi prometedora dende as alturas (nas que xa estaba). O destino fixo que voltase a Salamanca 40 anos despois... A reportaxe fotográfica de Xabier Oviedo [17 fotos] iremola pendurando paseniñamente en chegando. Beizón!