Blog Asociación Amigos de Francisco Carballo

NA CASA GRANDE DE MANUEL MARÍA

A amizade de Francisco Carballo con Manuel María podemos levala até 1977, cando o presbítero ilustrado de Maceda entra de cheo no mundo da política, mesmo como candidato ao Senado pola circunscrición de Ourense e Manuel María tamén como candidato ao Senado pola de Lugo, os dous baixo as siglas do BN-PG. Mesmo aparecen nun vídeo de peche de campaña no vello pavillón de Sar en Compostela do que xa temos falado [*]. Naquela altura Manuel María residía en Monforte de Lemos traballando como procurador, impartindo aulas en academias e á fronte dunha librería que rexentaba en tándem coa sua compañeira Saleta Goi. Meterémoslle o dente a esa amizade en varias achegas. Desta volta queremos reparar na singular Casa-Museo Manuel María en Outeiro de Rei, o seu lugar natal, acaroada á casa do concello (aínda que cun letreiro equívoco...). O poeta chairego deixou inmortalizado: "Eu nacín nunha casa moi fermosa e, nela, deixei o meu pasado, o tempo da nenez, o soño ousado e a miña adolescencia tormentosa". Visitamos esta casa grande -que non ten nada que envidiarlle a outras casas literarias que temos polo Noso País- este domingo pola mañá. Tivemos a fortuna de atoparnos con Antón, un guía moi profesional que amosaba paixón polo poeta da Terra Chá. Fomos percorrendo estancias, mundos e legado do escritor durante case dúas horas. Sabíamos da súa interesante pinacoteca con cadros dos mellores artistas galegos da súa época. Tamén que tiña unha biblioteca con máis de 12.000 libros. Nós fornecémola con outro da nosa autoría: a monografía que lle dedicamos a Manuel Vidal (Prol: 2017). Mobiliario, documentos, obxectos (nomeadamente navallas e cerámica de Sargadelos), primeiras edicións..., metéronnos de cheo na súa traxectoria literaria e vital. Manuel María era catro anos máis novo que Francisco Carballo (nacera en 1929). Ao longo da visita departimos co guía sobre esa relación en distintas etapas das súas vidas. Mesmo nos comentou Antón que el estivera na Homenaxe Nacional que lle fixemos en Maceda a Francisco Carballo, poucos días despois do pasamento do historiador en 2014. Invitamos a quen nos visite nesta bitácoca, se achegue até esa fermosa Casa-Museo Manuel María. Logo que vaia de vagar pola beira do Pai Miño que está ao seu carón, mesmo baixando pola rúa que leva o nome do poeta no seu concello natal. Seguiremos co vencello. Beizón!

N.B.- A primeira imaxe amosa parte do díptico que lle dan aos visitantes, e que nós inserimos cunha imaxe do folleto co que tamén agasallan a quen visite este interesante museo. Na segunda imaxe podemos ollar a placa da rúa que leva o seu nome e na terceira ao Pai Miño, moi perto do berce do poeta chairego, mesmo onde se xunta co río Ladra [e o Río Pequeno -que el colocaba, literariamente falando, ao mesmo nivel que os outros dous]-. Podemos disfrutar dunha ruta de sendeirismo -con muíños acaroados- abondo interesante...

Eis o enlace á moi aqueloutrada páxina web da Casa-Museo de Manuel María en Outeiro de Rei. Paga a pena reparar nela:

http://www.casamuseomanuelmaria.gal/portada.htm;jsessionid=832BED34BE86399D3D9C700A47845A3A

[*] O vídeo referenciado -do que xa temos falado na bitácora e no que aparecen Francisco Carballo e Manuel María, ao comezo e ao remate da inestimábel montaxe audiovisual de Xan Carballa-, inserímolo ao final da achega do 16-09-2018 en vídeos: http://fcarballo.blogspot.es/1537092259/video-de-xan-carballa-na-homenaxe-nacional-marin-2005/



Comentarios

No hay ningún comentario

Añadir un Comentario: