Blog Asociación Amigos de Francisco Carballo

LEMBRANZA POLO FALECEMENTO

Xosé Manuel González Pérez, profesor de Lugo que a finais dos anos 70 do século pasado traballou n'ANT, fixo unha lembranza no Facebook, o 29 de novembro de 2014, xusto o día no que Francisco Carballo nos deixaba. Rescatou o texto Xan Carballa e decidimos penduralo na bitácora: "Rexo sempre, sorriso e voz de labrego cando viña pola redacción compostelá d'A Nosa Terra, na República del El Salvador, mediando a costa. Conducíu o mitin final na campaña do BN-PG no Pavillón das Travesas en Vigo, cando as Primeiras Eleccións Xerais (1977), e foi súa a expresión máis intensa. Pasaba, no nacionalismo, por ser probabelmente un dos homes máis formados; ora que tamén discreto. Case nunca máis o vin, desde finais dos 70, pero velaí a lembranza aproximante a aquel final de conferencia, en Lugo, fronte a un auditorio mozo predicando a coherencia: Se non cristiáns, polo menos, ¡sede marxistas! En paz estea".

Eis o documento gráfico, que xa forma parte da Nosa Historia e da súa biografía. De esquerda a dereita: Leopoldo (cura de Melide), Francisco Rodríguez, Ramón López Suevos, Elvira Souto, Lois Ríos Paredes, Ramón Valcárcel, Manuel María, Camilo Nogueira (de pé), Pedro Luaces, Bautista Álvarez e Francisco Carballo, no mitin central do BN-PG no Pavillón das Travesas (completamente abarrotado de público), en Vigo de cara as Primeiras Eleccións Democráticas do 15 de xuño de 1977. Naquel mitin o presbítero ilustrado de Maceda defendeu a unidade do nacionalismo de esquerdas nunha soa organización a prol da defensa da nosa identidade. (Fonte fotografía: Camilo Nogueira e outras Voces. Suso de Toro. Xerais, 1991).

Comentarios

No hay ningún comentario

Añadir un Comentario: